Жиззах туманлараро маъмурий суди ташаббуси билан Абдулла Қодирий номидаги Жиззах давлат педагогика университетида талабалар иштирокида давра суҳбати ташкил этилди
Давра суҳбатида университетнинг бакалавр ва магистратура босқичида таҳсил олаётган талабалар иштирок этишди.
Суҳбат давомида талабаларга маъмурий судлар фаолияти, унинг фуқароларнинг ҳуқуқ ва манфаатларини ҳимоя қилишдаги аҳамияти, шунингдек, маъмурий органлар ва улар мансабдор шахсларининг қарорлари ёки ҳаракатлари устидан шикоят қилиш тартиби ҳақида батафсил маълумот берилди.
Қонунчиликда белгиланганидек, ҳар бир фуқаро ёки ташкилот ўз ҳуқуқлари ёки қонуний манфаатлари бузилган деб ҳисобласа, маъмурий орган ёки унинг мансабдор шахси қарорини ҳақиқий эмас деб топиш ҳамда унинг ҳаракатини ёки ҳаракатсизлигини қонунга хилоф деб эътироф этиш тўғрисида судга мурожаат қилиш ҳуқуқига эга.
Шу билан бирга, судда бундай ишлар бўйича қарор ёки ҳаракатнинг қонунийлигини исботлаш мажбурияти маъмурий органнинг ўзи зиммасига юклатилади. Бу эса фуқароларнинг суд олдида ҳуқуқларини таъминлаш имкониятларини кенгайтириб беради.
Судья томонидан талабаларга судга ариза бериш тартиби, муддатларга риоя этиш, шикоятни судда кўриб чиқиш босқичлари ҳақида ҳам амалий мисоллар билан тушунтирилди.
Суҳбат очиқ мулоқот шаклида ўтиб, талабалар ўзларини қизиқтирган саволларга жавоб олишди.
Маъмурий судлар фуқароларнинг ҳуқуқларини тиклаш, давлат органлари фаолиятида шаффофлик ва қонун устуворлигини таъминлашда муҳим ўрин тутади. Шу орқали талабалар суд тизими фаолияти ва фуқаролар ҳуқуқларини ҳимоя қилишда маъмурий судларнинг роли ҳақида кенгроқ тушунчага эга бўлдилар.
Бундай амалий учрашувлар ёшларда ҳуқуқий маданиятни ошириш, қонунларга ҳурмат туйғусини шакллантириш ва фуқаролик жамиятини барпо этишда муҳим аҳамият касб этади.