Жиззах вилояти судлари томонидан вилоят суди биносида оммавий ахборот воситалари вакиллари ва блогерлар учун матбуот анжумани ҳамда очиқ эшиклар куни ташкил этилди
Тадбирда дастлаб вилоят суди томонидан тайёрланган вилоят суди ҳамда вилоят маъмурий судининг тузилиши ва фаолияти ёритилган видеоролик намойиш этилди. Шундан сўнг, Жиззах вилоят суди раиси Акрам Шукуров томонидан суд тизимидаги амалга оширилаётган ислоҳотлар ҳамда 2024 йил давомида вилоят суди томонидан амалга оширилган ишлар ҳақида йиғилганларга тушунтириб ўтди. Шунингдек, вилоят суди раиси Жиззах вилояти судлари тарихига бағишлаб ёзилган “Жиззах вилоят судлари: тарих, тараққиёт, бугун” номли китобининг яратилиш тарихи ҳамда унинг мазмун-моҳияти ҳақида қисқача тўхталиб ўтди.
Шундан сўнг, Жиззах вилоят маъмурий суди раиси Сарварбек Рахмонов томонидан 2024 йил давомида маъмурий судлар томонидан кўрилган ишларнинг 216 тасини ер билан боғлиқ ишлар ташкил қилиб, ушбу ишларнинг 109 таси қаноатлантирилганлиги, 87 таси рад этилганлиги, 4 таси иш юритишдан тугатилиб, 16 таси кўрмасдан қолдирилганлиги ҳамда ушбу ишлар бўйича йўл қўйилган хато ва камчиликлар юзасидан вилоят, туман, шаҳар ҳокимликларига нисбатан 105 та хусусий ажримлар чиқарилиб, муҳокама қилиш ва тегишли чоралар белгилаш учун юборилганлиги таъкидланди
Жиззах вилоят судининг жиноят ишлари бўйича судлов ҳайъати раиси Раҳматилла Орзиқулов 2024 йил давомида вилоят судлари томонидан 18 шахсга нисбатан оқлов ҳукмлари чиқарилганлиги ҳамда жиноят ишлари бўйича туман ва шаҳар судлари томонидан 30 нафар шахс шартли ҳукм қилинганлиги, 58 нафар шахсга жазо тайинланмасдан ҳукм чиқарилганлиги, 213 нафар шахс суд залида қамоқдан озод қилинганлиги, 1616 нафар шахсга озодликдан маҳрум қилиш билан боғлиқ бўлмаган жазолар тайинланганлиги баён қилди.
Жиззах вилоят судининг иқтисодий ишлар бўйича судлов ҳайъати раиси Жамол Қаххоров томонидан 2024 йил давомида суд мажлисларининг тарбиявий ва профилактик аҳамиятини ошириш, томонларга суд процессида қатнашиб, ҳуқуқ ва манфаатларини ҳимоя қилишлари учун қулайлик яратиш мақсадида кўрилган ишларнинг 4 610 таси сайёр суд мажлисларида ҳал этилганлиги айтиб ўтилди.
Жиззах вилоят судининг фуқаролик ишлари бўйича судлов ҳайъати раиси Нодиржон Расулов томонидан 2024 йил давомида кўрилган никоҳдан ажратиш ҳақидаги ишлар умумлаштирилиб, қизил тоифага киритилган маҳаллаларда хотин-қизларнинг ҳуқуқ-манфаатларини ҳимоя қилиш, оилаларни мустаҳкамлаш, оилавий низолар ҳамда никоҳдан ажрашиш ҳолатларини олдини олиш юзасидан тегишли тадбирлар амалга оширилганлиги таъкидланди
Тадбир иштирокчилари ўзларини қизиқтирган барча саволларига атрофлича жавоб олишди.
Шундан сўнг, медиа вакиллари вилоят суди бўлимларининг фаолияти ҳамда суд заллари билан таништирилди.
